Şu gün hormatly Prezidentimiz Serdar Berdimuhamedow ýurdumyza sapar bilen gelen «Toyo Engineering Corporation» kompaniýasynyň prezidenti, Baş ýerine ýetiriji direktory, wekilçilik müdiri Eiji Hosoini kabul etdi.

Myhman duşuşmaga döredilen mümkinçilik üçin hoşallyk bildirip, Türkmenistan bilen ikitaraplaýyn gatnaşyklary ösdürmäge Ýaponiýada aýratyn ähmiýet berilýändigini nygtady hem-de ýurdumyzda iş alyp barmagyň «Toyo Engineering Corporation» kompaniýasy üçin uly hormatdygyny belledi.

Hormatly Prezidentimiz işewüri mübärekläp, onuň ýurdumyza amala aşyrýan şu saparynyň dowamynda «Türkmenistanyň gurluşyk, senagat, himiýa we energetika pudaklarynyň ösüşi» atly halkara sergä we maslahata gatnaşjakdygyny aýtdy hem-de alyp barýan işlerinde, ikitaraplaýyn hyzmatdaşlygy ösdürmek ugrundaky täze başlangyçlarynda uly üstünlikleri arzuw etdi.

Duşuşygyň dowamynda bellenilişi ýaly, Türkmenistan bilen Ýaponiýanyň arasyndaky gatnaşyklar uzak möhletleýin strategik häsiýete eýedir. Bu gatnaşyklar özara hormat goýmak we birek-birege goldaw bermek ýörelgelerine esaslanýar.

Döwlet Baştutanymyz ýurtlarymyzyň arasyndaky ykdysady mümkinçilikleriň ulanylmagynda iri ýapon kompaniýalarynyň uly goşandynyň bardygyny nygtap, köp ýyllaryň dowamynda Türkmenistanyň gaz pudagynda, himiýa senagatynda bilelikdäki taslamalaryň durmuşa geçirilendigini, «Toyo Engineering Corporation» kompaniýasy bilen nebitgaz we himiýa ulgamlarynda netijeli hyzmatdaşlygyň ýola goýlandygyny aýtdy hem-de bu kompaniýanyň gatnaşmagynda Gyýanlyda ägirt uly gazhimiýa desgasynyň —polimer zawodynyň gurlup ulanmaga berlendigini belledi.

Hormatly Prezidentimiz ýurdumyzda taslamalar amala aşyrylanda öňdebaryjy tejribäniň, ýokary tehnologiýalaryň ulanylmagynyň, halkara hil ölçegleriniň we ekologiýa talaplarynyň üpjün edilmeginiň möhüm şert bolup durýandygyna ünsi çekdi hem-de ikitaraplaýyn hyzmatdaşlygy mundan beýläk-de ösdürmek üçin giň mümkinçilikleriň bardygyny aýtdy.

Işewür türkmen bazarynda netijeli işlemäge döredilýän amatly şertler üçin ýene bir gezek hoşallyk bildirip, ýolbaşçylyk edýän kompaniýasynyň öz üstüne alan şertnamalaýyn borçnamalaryny ýerine ýetirmäge jogapkärçilikli çemeleşjekdigine ynandyrdy.

Duşuşygyň ahyrynda hormatly Prezidentimiz Serdar Berdimuhamedow we «Toyo Engineering Corporation» kompaniýasynyň prezidenti, Baş ýerine ýetiriji direktory, wekilçilik müdiri Eiji Hosoi birek-birege iň gowy arzuwlaryny beýan etdiler.