Watan goragçylarynyň güni mynasybetli dabaralar Türkmenistanyň Goranmak ministrliginiň Merkezi serkerdeler öýünde ýaýbaňlandyryldy. Onuň dowamynda hormatly Belent Serkerdebaşymyzyň degişli Permanlaryna laýyklykda, Türkmenistanyň Ýaragly Güýçleriniň düzüminde eziz Watanymyza ak ýürek bilen wepaly gulluk edýän harby gullukçylary we işgärleri döwlet sylaglary bilen sylaglamak, hünär derejelerini bermek hem-de nobatdaky harby we ýörite atlary dakmak dabarasy boldy. Halkymyzyň abadan durmuşyny üpjün etmekde, ýurdumyzyň serhet çäklerini mynasyp derejede goramakda, pederlerimizden gelýän mertlik, edermenlik, watanperwerlik ýaly belent häsiýetlere ygrarlylykda we harby borja wepalylykda tapawutlanan harby gullukçylara döwlet sylaglaryň gowşurylyp, ýörite harby atlaryň dakylmagy, hünär derejeleriniň berilmegi eziz Diýarymyzda Watan goragçylary hakynda aýratyn alada edilýändigini, olara belent sarpa goýulýandygyny ýene bir ýola äşgär etdi.

Döwlet sylaglaryny uly hormat bilen kabul eden Watan goragçylary döwlet baýdagymyza togap edip, wepalylyk kasamyny ýerine ýetirdiler. Sylaglanan harby gullukçylar mukaddes borja wepalylyk bilen, hormatly Belent Serkerdebaşymyzyň durmuşa geçirýän oňyn özgertmeleriniň dabaralanmagy ugrunda yhlaslaryny gaýgyrman gulluk etjekdiklerine ynandyrdylar hem-de yhlasly gulluklaryna berlen uly baha üçin döwlet Baştutanymyzyň adyna tüýs ýürekden alkyş sözlerini aýtdylar.