Şu günler Türkmenistanyň Ýaragly Güýçleriniň harby bölümlerinde ýaş esgerleriň harby kasamy kabul etmegi mynasybetli dabaraly çäreler geçirilýär. Bu däp Türkmenistanyň Konstitusiýasyna we «Harby borçluluk we harby gulluk hakynda» Türkmenistanyň Kanuna laýyklykda amala aşyrylýan güýzki çagyryş möwsüminiň möhüm dabaralarynyň hatarynda orun alýar.

Harby kasamy kabul etmek dabaralary esgerleriň ýakyn garyndaşlarynyň we dost-ýarlarynyň gatnaşmagynda harby bölümleriň nyzam meýdançalarynda geçirilýär. Ýöriş we bedenterbiýe taýýarlygyny, harby düzgünnamalary öwrenmegi, gullugyň howpsuzlyk esaslaryny hem-de ýaraglaryň taktiki-tehniki häsiýetnamalaryny öz içine alýan başlangyç taýýarlyk tapgyry tamamlanandan soň, täze esgerler ilkinji gezek jemgyýetiň öňünde Türkmenistanyň Garaşsyzlygyny, çäk bitewiligini we konstitusion gurluşyny goramak baradaky kasamy kabul edýärler.

Ýaş esgerler öz täsirlerini paýlaşanda: «Harby kasam kabul etmek — ömür boýy ýatda galjak pursat. Meniň üçin goşunda gulluk etmek — hormatly borç, Watan goragçylarynyň hatarynda durýandygym üçin buýsanýaryn» — diýip, harby gulluga çagyrylan esger Maksat Geldiýew belledi.

Täze esgerleriň biri Amanmyrat Kakaýew bolsa harby gulluk bilen ykbalyny baglamak niýetini paýlaşmak bilen: «Çagalykdan goşuna özümi bagyşlamagy arzuw etdim. Harby gulluga çagyryşdan soň Ýaragly Güýçlerde zähmet ýolumy dowam etdirip, Türkmenistanyň goranyş kuwwatyny berkitmäge goşant goşmak isleýärin»  diýdi.

Harby kasam kabul edileninden soňra çagyryş boýunça harby gullukçylar umumy harby we ýörite taýýarlyga girişerler, gullugyň tertibine laýyklykda wezipelerini ýerine ýetirmäge başlarlar.

Dabaraly çäreler Türkmenistanyň Prezidenti, Türkmenistanyň Ýaragly Güýçleriniň Belent Serkerdebaşysy goşun generaly Serdar Berdimuhamedowyň Permanyna laýyklykda, 2025-nji ýylyň oktýabr – dekabr aýlary aralygyndaky harby gulluga çagyryş möwsüminiň barşynda dowam eder.