Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag we Aşgabat şäherleri boýunça iş saparyny amala aşyrdy. «Watan» habarlar gepleşiginde habar berlişi ýaly, iş saparynyň barşynda Ministrler Kabinetiniň Başlygynyň gurluşyk toplumyna we Aşgabat şäherine gözegçilik edýän orunbasary B.Annamämmedow Türkmenistanyň Prezidentiniň tabşyrygyna laýyklykda ýurtda alnyp barylýan gurluşyk işleri barada hasabat berdi we Gahryman Arkadagymyzdan bu ugurda öz öwüt-nesihatlaryny bermegini haýyş etdi.

Halk Maslahatynyň Başlygy ilki Aşgabatda gurulmagy meýilleşdirilýän saglyk merkezleriniň taslamalary bilen tanyşdy.

Wise-premýer B.Annamämmedow bu taslamalar barada hasabat berdi. Ol ýurduň saglyk merkezleriniň işini kämilleşdirmek, Myrat Garryýew adyndaky TDLU-nyň hassahanalar toplumynyň taslamalary, okuw-ylmy merkezlerde ýokary derejeli, tejribeli lukmanlary taýýarlamak we bu ugry ösdürmegiň işlenip taýýarlanylan meýilnamalary babatda Gahryman Arkadagymyzdan maslahatlaryny bermegini haýyş etdi.

Türkmenistanyň Halk Maslahatynyň Başlygy Gurbanguly Berdimuhamedow görkezilýän taslamalar we gurulmagy meýilleşdirilýän lukmançylyk edaralarynyň ýerleşjek ýerleriniň çyzgylary bilen tanşyp, olara birnäçe belliklerini aýtdy we ähmiýetli maslahatlaryny berdi.

Gahryman Arkadagymyz Myrat Garryýew adyndaky TDLU-nyň hassahanalar toplumynyň çäginde Indira Gandi adyndaky lukmançylyk orta hünär okuw mekdebiniň gurulmagynyň we toplumyň ýanynda lukmançylyk hünärini öwrenýän mugallymlar, aýratyn-da, ýaş mugallymlar üçin ýaşaýyş jaýlarynyň, talyplar üçin umumy ýaşaýyş jaýynyň gurulmagynyň maksadalaýyk boljakdygyny belläp, wise-premýer B.Annamämmedowa bu meseleler babatda Türkmenistanyň Prezidentine ýüzlenmegi maslahat berdi.