Şu gün Gahryman Arkadagymyzyň başlangyjy bilen binýat bolan Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 5 ýyllygy mynasybetli dabara geçirildi. Şäheriň baýramçylyk meýdançasynda ýaýbaňlandyrylan çäreler “Garaşsyz, baky Bitarap Türkmenistan — bedew batly at-myradyň mekany” ýylynyň şanly wakalarynyň many-mazmun taýdan has-da baýlaşmagyny şertlendirdi.

  Dabarada, ilki bilen, hormatly Prezidentimiz Serdar Berdimuhamedowyň bu ýerde guralýan medeni çärelere gatnaşyjylara iberen Gutlagy okaldy.

Dabaranyň dowamynda sahawatly ýörelgeleri ösdürmekde işjeňlik görkezen halkara guramalaryň ýurdumyzdaky wekilhanalarynyň käbir ýolbaşçylaryny Türkmenistanyň “Arkadag” medaly bilen sylaglamak hakynda hormatly Prezidentimiziň gol çeken Permany okaldy. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa dabaraly ýagdaýda Birleşen Milletler Guramasynyň Ösüş maksatnamasynyň Türkmenistandaky hemişelik wekili Narine Saakýany we Birleşen Milletler Guramasynyň Çagalar gaznasynyň (ÝUNISEF) Türkmenistandaky wekili Jalpa Ratnany mynasyp bolan sylaglary bilen gutlap, olara “Arkadag” medalyny gowşurdy. Munuň özi halkymyzyň ýagşy dessurlaryny ilerletmek, Türkmenistanyň haýyr-sahawat ýörelgelerini halkara giňişlikde wagyz etmek ugrunda edilýän tagallalara berlen mynasyp baha hökmünde kabul edildi.

BMG-niň Çagalar gaznasynyň Türkmenistandaky wekili Jalpa Ratna hemmeleri haýyr işleri esasy ugur edinýän haýyr-sahawat gaznasynyň döredilmeginiň 5 ýyllygy mynasybetli gutlady. Şeýle hem ol binagärlik çözgüdi boýunça haýran galdyrýan ajaýyp şäherde şanly sene mynasybetli guralýan giň möçberli çärede özüne ýokary döwlet sylagynyň gowşurylmagyny aýratyn hormat hökmünde kabul edýändigini aýtdy. “Ýokary döwlet sylagy meni mundan beýläk-de netijeli işlemäge we Türkmenistan bilen ÝUNISEF-niň arasyndaky gatnaşyklary ösdürmäge mynasyp goşant goşmaga ruhlandyrýar” diýip, hanym J.Ratna belledi we munuň üçin hormatly Prezidentimize hem-de Gahryman Arkadagymyza tüýs ýürekden hoşallyk bildirdi.

Soňra dabara Türkmenistanyň Mejlisiniň Başlygy D.Gulmanowanyň çykyşy bilen dowam etdi. Milli parlamentiň ýolbaşçysy Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilen güni bilen Gahryman Arkadagymyzy we Arkadagly Gahryman Serdarymyzy gutlap, ýurdumyzda ýagşy dessurlaryň dabaralandyrylýandygyny alamatlandyrýan bu çäräniň ähmiýetine ünsi çekdi.

Ministrler Kabinetiniň Başlygynyň orunbasary B.Seýidowa hem hormatly Prezidentimizi we Gahryman Arkadagymyzy haýyr-sahawat gaznasynyň döredilmeginiň 5 ýyllygy bilen tüýs ýürekden gutlady. Onuň nygtaýşy ýaly, munuň özi halkymyzyň taryhyň dowamynda döreden asylly ýörelgeleriniň rowaç gadamlaryny alamatlandyrýan waka öwrüldi. Çagalar hakyndaky aladalarda halkymyzyň bagtyýar durmuşy öz beýanyny tapýar.

Birleşen Milletler Guramasynyň Ösüş maksatnamasynyň Türkmenistandaky hemişelik wekili Narine Saakýan hemmeleri bu günki şanly sene bilen tüýs ýürekden gutlap, özüne gowşurylan ýokary döwlet sylagyny uly buýsanç bilen kabul edýändigini aýtdy we munuň üçin hormatly Prezidentimize we Gahryman Arkadagymyza çuňňur hoşallygyny beýan etdi.

Çäräniň dowamynda dabara gatnaşyjylaryň çykyşlaryna giň orun berildi. Olarda ýagşy dessurlary baş ýörelge edinýän haýyr-sahawat gaznasynyň döredilen güni mynasybetli gutlag sözleri beýan edildi. Çykyşlarda Gahryman Arkadagymyzyň başlangyjy esasynda döredilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilen gününden bäri ösüp gelýän ýaş nesilleriň saglygynyň berkidilmegine, ýaşlaryň sazlaşykly ösüşiniň üpjün edilmegine gönükdirilen sogaply işleri amala aşyrýandygy bellenildi. Çykyş edenler türkmen halkyna mahsus asylly däpleriň ösdürilmeginde möhüm orny eýeleýän gaznanyň işine mundan beýläk-de uly rowaçlyklary arzuw etdiler. Şeýle hem olar ýurdumyzda sogaply işleriň dowamata atarylmagynda mynasyp goşant goşmak ugrunda ähli tagallalaryny gaýgyrmajakdyklaryna ynandyrdylar.

Soňra dabarada çykyş etmek üçin Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa söz berildi. Ol aýratyn ähmiýetli we buýsançly sene bolan haýyr-sahawat gaznasynyň döredilmeginiň 5 ýyllygy mynasybetli guralan çärä gatnaşyjylary bu dabarada görýändigine örän şatdygyny belledi.

“Şu günki aýdym-sazly dabara çagalaryň gözi bilen dünýä ser salmaga, olaryň arassa kalbyndaky umyt, ynam we päklik ýaly ýokary ynsanperwer gymmatlyklary duýmaga giň mümkinçilik döredýär. Bu bolsa jemgyýetimiziň ruhy baýlygynyň möhüm bölegi hökmünde kesgitlenen çagalarymyzyň ýüzündäki şatlyk duýgularynyň döremegine itergidir” diýip, O.Atabaýewa sözüni dowam etdi. Gahryman Arkadagymyzyň goldawlarynyň, hormatly Prezidentimiziň taýsyz tagallalarynyň netijesinde Türkmenistanda çagalar baradaky alada döwlet syýasatynyň ileri tutulýan ugurlarynyň birine öwrüldi. Döwletimiz ýaş nesilleriň saglygynyň goralmagyny, olaryň beden we ruhy taýdan sazlaşykly ösmegini jemgyýetiň durnukly ösüşiniň esasy şerti hökmünde ykrar edýär hem-de bu ugurda toplumlaýyn çäreleri durmuşa geçirýär.

Milli Liderimiziň Howandarlyga mätäç çagalara hemaýat bermek boýunça haýyr-sahawat gaznasyny döretmek hakynda 2021-nji ýylyň 29-njy martynda gol çeken taryhy Karary bu ugurdaky işleriň täze tapgyrynyň başlanandygyny alamatlandyrdy. O.Atabaýewa gaznanyň türkmen halkyna mahsus belent ynsanperwer ýörelgelere esaslanyp döredilendigini hem-de oňa Gahryman Arkadagymyzyň adynyň dakylandygyny aýdyp, bu çözgüdiň ýurdumyzda çagalaryň bähbidine amala aşyrylýan giň möçberli işleriň ähmiýetini has-da artdyrandygyna ünsi çekdi.

“Türkmen halkynyň Milli Lideri Gahryman Arkadagymyzyň hem-de Türkmenistanyň Prezidentiniň hemişelik üns merkezinde bolan haýyr-sahawat gaznasy häzirki wagtda ynsanperwerlik işini mynasyp dowam etdirýär. Gazna tarapyndan ýerine ýetirilýän haýyr-sahawat çäreleriniň netijesinde ýüzlerçe çaga ýokary derejeli lukmançylyk kömegini alyp, operasiýalar geçirilýär, bejeriş-dikeldiş hem-de öňüni alyş hyzmatlary üpjün edilýär. Bu bolsa döwletimiziň ynsanperwer syýasatynyň aýdyň beýany bolup durýar” diýip, gaznanyň wise-prezidenti nygtady. Ol gazna tarapyndan raýdaşlyk, duýgudaşlyk we açyk göwünlilik esasynda ýerine ýetirilýän her bir işiň jemgyýetimizde mähir-muhabbetiň, birek-birege goldaw bermegiň, ynsanperwerligiň has-da berkidilmegine uly goşantdygyny, häzirki wagtda bu düzümiň halkara ynsanperwer hyzmatdaşlygynyň barha giňeýändigini we täze derejä çykýandygyny belledi.

“Halkara parahatçylyk we ynanyşmak ýyly” diýlip yglan edilen 2025-nji ýylyň Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň guramagynda geçirilen halkara ähmiýetli wakalara beslenen ýyllaryň biri bolandygyny nygtamak gerek. Muňa ýurdumyzda we daşary ýurtlarda üstünlikli geçirilen halkara çärelerdir maslahatlar mysal bolup biler. Ýagny geçen ýylyň 29-njy martynda Arkadag şäherinde gaznanyň döredilmeginiň 4 ýyllygy mynasybetli “Parahatçylyk we ynanyşmak ýyly: çagalaryň hatyrasyna halkara işiniň ösüşi” atly halkara maslahat üstünlikli geçirildi. Şeýle-de Monako Knýazlygyna, Özbegistan Respublikasyna, Azerbaýjan Respublikasyna, Hytaý Halk Respublikasyna, Russiýa Federasiýasyna, Katar Döwletine amala aşyrylan saparlaryň dowamynda çagalaryň bähbidine gönükdirilen netijeli hyzmatdaşlygyň mümkinçilikleri giňişleýin ara alnyp maslahatlaşyldy. 10-njy dekabrda bolsa “Awaza” milli syýahatçylyk zolagynda Türkmenistanyň Hökümeti hem-de haýyr-sahawat gaznasy tarapyndan Birleşen Milletler Guramasy bilen bilelikde “Häzirki zaman jemgyýetinde zenanlaryň orny: Durnukly ösüş maksatlaryna ýetmek ugrunda halkara hyzmatdaşlygy ösdürmek” atly halkara maslahat guraldy.

Gazna tarapyndan Birleşen Milletler Guramasynyň Çagalar gaznasynyň (ÝUNISEF) Türkmenistandaky wekilhanasy, Hytaýyň Sun Sinlin adyndaky gaznasy, Azerbaýjanyň Geýdar Aliýew adyndaky gaznasy bilen özara düşünişmek hakynda Ähtnamalara gol çekilmegi çagalaryň sazlaşykly ösüşiniň bähbidine amala aşyrylýan halkara hyzmatdaşlygyň netijeli ösdürilýändiginiň beýanydyr.

“Biz mundan beýläk-de çagalaryň bagtyýar we ýagty geljegi üçin ähli tagallalarymyzy gaýgyrman, yhlasly zähmet çekmäge taýýardyrys. Bu işleriň häzirki döwürde türkmen jemgyýetinde birek-birege goldaw bermek, raýdaşlyk we agzybirlik ýörelgelerini has-da pugtalandyryp, jemgyýetimiziň jebisliginiň berk binýadyny emele getirjekdigine ynanýarys” diýip, O.Atabaýewa belledi. Ol gaznanyň işine goldaw berýän ähli watandaşlarymyza, hyzmatdaşlara hem-de dostlarymyza çuňňur hoşallygyny beýan edip, hemmeleri Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 5 ýyllygy mynasybetli tüýs ýürekden gutlady. Şeýle hem O.Atabaýewa olara şanly sene mynasybetli guralan baýramçylyk dabaralaryna gatnaşýandyklary üçin hoşallyk bildirdi.

“Gaznanyň alyp barýan asylly işi bitewüligiň, duýgudaşlygyň nusgasydyr. Geçen ýyllaryň dowamynda gaznanyň Türkmenistanda döwlet derejesinde alnyp barylýan we çagalaryň sagdynlygynyň, sazlaşykly ösüşiniň, abadançylygynyň üpjün edilmegine gönükdirilen ägirt uly işleri giň gerime eýe boldy. Ýaş nesiller hakyndaky alada durnukly hem-de sazlaşykly geljegiň kepilidir, parahatçylygyň, özara düşünişmegiň, asylly işleriň rowaçlanýan geljegine tarap ugurdyr. Halkymyzyň mätäje kömek goluny uzatmak, goldaw bermek ýaly asylly ýörelgelerinden ruhlanyp, haýyr-sahawat gaznasynyň Esaslandyryjysy — Prezidenti Gahryman Arkadagymyzyň parasatly ýolbaşçylygynda haýyrly işlerimizi dowam etdireris. Biz bir toprakda ýaşaýandygymyzy, çagalaryň ýerleşýän ýerlerine garamazdan, olaryň biz üçin ýokary gymmatlykdygyny hiç haçan unutmaly däldiris. Şonuň üçin hem ynanyşmak we özara düşünişmek köprülerini gurmak arkaly çagalaryň nurana geljegi ugrunda bilelikde tagalla ederis. Çünki parahat durmuş nesillerimiziň sazlaşykly ösüşiniň baş şertidir” diýip, O.Atabaýewa sözüni jemledi.

Soňra Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 5 ýyllygy mynasybetli guralan dabara ýurdumyzyň medeniýet we sungat ussatlarynyň belent ruha beslenen çykyşlary bilen dowam etdi. Şanly waka mynasybetli ýaýbaňlandyrylan konsertde teatr artistleriniň we Şükür bagşy adyndaky Arkadag şäher çagalar sungat mekdebiniň, çagalar tans toparlarynyň bilelikde ýerine ýetiren aýdym-sazly edebi kompozisiýasy täsirli pursatlara baý boldy. Ösüşleriň belentliklerine tarap ynamly gadam urýan ýurdumyzyň ýeten derejesiniň, halkymyzyň bagtyýar durmuşynyň waspnamasyna öwrülen aýdym-sazly çykyşlar dabaranyň many-mazmun taýdan has-da baýlaşmagyny şertlendirdi. Haýyr-sahawat gaznasynyň döredilen güni mynasybetli guralan baýramçylyk konsertiniň dowamynda milli aýdym-sazlar bilen birlikde, daşary ýurtlaryň dünýä belli eserleriniň ýaňlanmagy has-da täsirli boldy.

Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 5 ýyllygy mynasybetli geçirilen dabara gatnaşyjylar hormatly Prezidentimiz Serdar Berdimuhamedowyň adyna Ýüzlenme kabul etdiler.