Şu gün ýurdumyzda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 4 ýyllygy mynasybetli «Parahatçylyk we ynanyşmak ýyly: çagalaryň hatyrasyna halkara işiniň ösüşi» atly halkara maslahat geçirilýär. Oňa gatnaşmak üçin dünýäniň birnäçe döwletlerinden hormatly myhmanlar ýurdumyza geldiler.

Bu maslahatyň Halkara parahatçylyk we ynanyşmak ýylynda Türkmenistanda geçirilmegi aýratyn many-mazmuna eýedir. Çünki Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy sebitde we dünýäde ynsanperwer gatnaşyklary barha pugtalandyrýar. Dünýäniň birnäçe döwletlerine ynsanperwerlik kömeginiň iberilmegi bu gaznanyň ýurtlaryň arasyndaky dostlukly gatnaşyklary ösdürmäge möhüm goşant goşýandygynyň aýdyň mysalydyr.