Şu gün «Awaza» milli syýahatçylyk zolagynyň Kongresler merkezinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlyklyk etmeginde Merkezi Aziýa döwletleriniň Baştutanlarynyň ýedinji konsultatiw duşuşygyna gabatlanan çäre geçirildi. Foruma Gazagystan Respublikasynyň Prezidenti Kasym-Žomart Tokaýew, Täjigistan Respublikasynyň Prezidenti Emomali Rahmon, Özbegistan Respublikasynyň Prezidenti Şawkat Mirziýoýew hem-de Gyrgyz Respublikasynyň Ministrler Kabinetiniň Başlygy, Prezidentiň Diwanynyň ýolbaşçysy Adylbek Kasymaliýew gatnaşdylar.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow forumy açyp we belent mertebeli myhmanlary mübärekläp, hemmelere BMG-niň Deňze çykalgasy bolmadyk ösüp barýan döwletler boýunça üçünji maslahatyna gatnaşmaga çakylygy kabul edendikleri, Merkezi Aziýa döwletleriniň Baştutanlarynyň şu duşuşyga gatnaşýandygy üçin minnetdarlyk bildirdi. Gahryman Arkadagymyzyň belleýşi ýaly, bu forum Merkezi Aziýa döwletleriniň Baştutanlarynyň doganlyk Özbegistanyň paýtagty Daşkent şäherinde geçiriljek ýedinji konsultatiw duşuşygyna taýýarlyk tapgyry bolup durýar.

Soňra türkmen halkynyň Milli Lideri şu ýylyň güýzünde nobatdaky konsultatiw duşuşygy kabul edýän döwletiň Baştutany hökmünde Özbegistan Respublikasynyň Prezidenti Şawkat Mirziýoýewe söz berdi.

Soňra Prezident Ş.Mirziýoýew konsultatiw duşuşygyň başlygy hökmünde bu formatda geçirilýän bilelikdäki işler barada habar berdi.

Türkmenistanyň Halk Maslahatynyň Başlygy Gurbanguly Berdimuhamedow çuň manyly çykyşy üçin Özbegistanyň Liderine minnetdarlyk bildirdi.

Soňra Gahryman Arkadagymyz Merkezi Aziýa döwletleriniň Baştutanlarynyň ýedinji konsultatiw duşuşygynyň ähmiýeti, hemişelik Bitarap Türkmenistanyň bu çäre boýunça ileri sürýän ugurlary barada taryhy çykyş etdi.  Türkmen halkynyň Milli Lideri çykyşyny tamamlap, Özbegistan Respublikasynyň Prezidenti Şawkat Mirziýoýewi «Hyzmatdaşlygy ösdürmäge goşandy üçin» ordeni bilen sylaglamak barada karara gelnendigini aýtdy we Türkmenistanyň Prezidentiniň degişli Permanyny okady.

Soňra Özbegistan Respublikasynyň Prezidenti Şawkat Mirziýoýewi Türkmenistanyň döwlet sylagy bilen sylaglamak dabarasy boldy. Özbegistanyň Baştutany bu ýokary sylaga dostluk we hoşniýetli goňşuçylyk gatnaşyklaryny, hyzmatdaşlygy ösdürmekde, sebitde parahatçylygy we howpsuzlygy pugtalandyrmakda, Merkezi Aziýa ýurtlarynyň bilelikdäki bähbitlerini, başlangyçlaryny halkara bileleşikde ilerletmekde bitiren uly hyzmatlary üçin mynasyp boldy.

Dabara tamamlanandan soňra, döwlet Baştutanlary BMG-niň Deňze çykalgasy bolmadyk ösüp barýan döwletler boýunça üçünji maslahatynyň geçirilýän ýerine ugradylar.