Türkmenistanyň Goranmak ministrliginiň Berdimuhamet Annaýew adyndaky 1-nji Ýöriteleşdirilen harby mekdebinde robot tehnikasy boýunça içerki çempionat geçirildi. Bäsleşik Watana gulluk etmek ýoluny saýlan türkmen ýaşlarynyň intellektual mümkinçiliklerini we tehniki taýýarlygyny görkezdi.

Harby okuwçylar öňde goýlan wezipeleri amaly häsiýetde ýerine ýetirdiler. Harby mekdebiň okuw bölüminiň informatika mugallymy Myrat Geldiýewiň bellemegine görä, döwrebap harby bilim ojagy iň täze tehnologiýalar bilen enjamlaşdyrylandyr. Robot tehnikasy otaglaryndan başga-da, mekdepde lazerli türgenleşik zallary we bodi-flaýting otagy hem işleýär. Bu ýaryş harby okuwçylaryň häzirki zaman tehnologiýalaryndan peýdalanyp, nazary we amaly meseleleri çözmegi başarýandyklaryny görkezdi.

Harby mekdebiň täze binalar toplumy 2024-nji ýylyň 1-nji sentýabrynda Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedowyň gatnaşmagynda açylyp ulanmaga berildi.

«Bu ýerde bolmak – uly mertebe we jogapkärçilik. Bu ýaryş – uly ýaryşlara badalga berýän başlangyç synag ýalydyr» — diýip, harby okuwçy Adylşa Mämmettuwakow belledi. Onuň sözlerine görä, bäsleşige gatnaşanlaryň hemmesi geljekde serkerde bolmagy arzuwlaýarlar we Türkmenistanyň Goranmak ministrliginiň Harby institutynyň giriş synaglaryna taýýarlyk görýärler. Munuň üçin ýurdumyzyň taryhyny içgin öwrenýärler we beden taýýarlygyny güýçlendirýärler.